Frå storby til storhav på under ein halv time Fjell kommune, det moderne og pulserande øysamfunnet rett vestom Bergen, omlag 21 412 innbyggjarar (2.kv.08), raskt veksande bustad- og industriområde og eit innhaldsrikt kommunesenter på Straume. Arealet på 147 km2 er fordelt på nordre delen av Sotra, Bildøyna, Litlesotra og meir enn 500 store og små øyar, holmar og skjer.
Kommunen har fastlandssamband til Bergen, stor tilflytting og eit ekspansivt næringsliv bygt på olje, teknologi og service. Kystbasen CCB og Ågotnes Industriområde er Vest-Noregs viktigaste senter for service og forsyningstenester til olje- og gassverksemda i Nordsjøen.
Vekstkommunen i vest Fjell er ein nærings- og tilflyttingsvennleg kommune, og menneske og verksemder trivst og blir verande. Dei kommunale tilboda er der folk bur. Vi har i dag 18 grunnskular, kulturskule, vaksenopplæring og vidaregåande skule. Våre to tusen barn under seks år kan velja mellom 9 kommunale og nær 30 private heildags- og korttidsbarnehagar. Helse- og omsorgstilbodet omfattar to store legesenter og moderne, lettstelte bustader for den som treng hjelp til det daglege. Eit mangfaldig foreinings- og kulturliv - med idrettsanlegg, symjebasseng og fotballbaner, lokale kulturbygg, kystkultursenter og tre kyrkjer - legg til rette for kulturelle møtestader og sosiale nettverk.
Aktiv fritid Naturen byr på rekreasjon og gode opplevingar, med lyngheiar og svaberg, blenkjande vatn og ope hav. Her kan du fiska frå land, dykka og rafta, padla, ro eller segla, vandra i strandkanten eller klatra i bratte fjellsider. I det kuperte terrenget finn du turløyper på kryss og tvers. Nordsjøløypa er rydda og merka gjennom heile kommunen. Har du båt, kan du leggja til mellom holmar og skjær, nyta solnedgangen og den gode stilla… eller du kan leggja frå deg fiskestanga og gå opp til Fjell festning, to kilometer opp frå RV 555 ved Fjell gard. På historisk grunn - langs skyttargraver og underjordiske gangar - kan du nyta panoramautsikta over skjergarden. Sotra og Øygarden Forsvarsforening har ”open dag” kvar sommar, med guida turar inne i det dystre, men fascinerande festningsverket frå siste verdskrigen.
Vestkystfestivalen, Langøymarknaden og talrike kystkultur-, idretts- og musikkstemne er trivelege aktivitetar å få med seg. Finn du likevel ikkje det du søkjer, er det berre eit kvarters kjøretid inn til Bergen sentrum.
