Hordaland fylkeskommune tek seg av oppgåver som er for store til at alle kommunar kan klare dei åleine, eller saker som går på tvers av kommunane. Øvste styringsorgan i fylkeskommunen er fylkestinget.
Hordaland fylkeskommune er ein av fylkets største arbeidsgjevarar med 4 370 tilsette og eit årleg budsjett på om lag 3 800 millionar kroner (2007). Om lag 60 % av budsjettet vert nytta til vidaregåande opplæring og om lag 3 500 av dei tilsette arbeider i opplæringssektoren.
Fylkeskommunen sine inntekter kjem hovudsakleg frå lokale skattar (om lag 45 %) og statlege rammeoverføringar (om lag 30 %). Dessutan frå øyremerkte overføringar frå staten pluss diverse inntekter. Rammene for fylkesøkonomien vert i stor grad fastsette sentralt av statlege styresmakter.
Gjennom Vestlandsrådet samarbeider Hordaland fylkeskommune med Rogaland, Sogn og Fjordane og Møre og Romsdal fylkes- kommunar om å fremje felles saker nasjonalt og om utviklinga av landsdelen.
Fylkeskommunen er det mellomste av dei tre forvaltningsnivåa i Noreg, og er styrt av fylkestinget. Dei to andre forvaltningsnivåa er kommune og stat.
