Fusa kommune ligg sentralt i Hordaland mellom Hardanger og Bergen og mellom Sunnhordland og Nordhordland. Fusa ligg i det frodige og opne fjordlandskapet i Midthordland. Her er det vidare og lysare enn i dei indre stroka av fylket. Det er ei lang kystline på 137 km med mange holmar og skjær, samstundes som ein har fjellheimen i ryggen mot aust med toppar opp til 1299 m.o.h., med Tveitakvitingen i grenseland til Kvamskogen.
I kommunesenteret Eikelandsosen finn ein m.a. dei offentlege kontora, felles ungdomsskule og vidaregåande skule.
Utsyn frå Skagetongen på VinnesFusa kommune er stor i utstrekning med sine 378 km2, men relativt liten i folketal med vel 3750 innbyggjarar. Fusa-samfunnet har likevel eit vitalt miljø med både aktivt kulturliv og eit driftig næringsliv. I motsetnad til mange andre distriktskommunar opplever Fusa ein viss oppgang i folketalet. Mykje av grunnen til dette er at Fusa ligg i pendlaravstand til Bergen og at Fusa har hatt verksemder som har ekspandert med auka aktivitet i seinare år.
